ACARA PETANDAKEN – ADAT KARO
( Matius Purba CP: 081 281 30 60 60 )
Hal-hal Ibas Petandaken :
1. Pihak si empo mbaba nakan
2. Ilakoken kenca dung man
Tujuan Petandaken :
1. Sitandan orangtua pekepar bagepe ras kerina si pulung
2. Nehken Sura-sura/Nungkun Kata
3. Erbahan pudun MBS
LANGKAH-LANGKAH PELAKSANAAN :
A. Man/makan
B. Orati Perpulung
C. Benai Runggu
D. Petandaken
E. Nungkun Kata
F. Erbahan Pudun MBS
PELAKSANAAN :
A. Man : iaturken rikutken situasi
B. NGORATI PERPULUNG :
Masing2 Anak Beru Pekepar ngorati Kalimbubu pekepar kerna perpulung.
Nungkun Perpulung Arah Si NEREH/SIDIBERU :
1. Anak Beru Sinereh man Kalimbubuna:
Man kam kerina kalimbubu kami X mergana, uga perpulungndu ras sembuyak seninandu sue ras tenah sitenahkenndu, terlebih kami Anak berundu.
2. Senina SiNereh man Sembuyakna : (Ngorati perpulung : Sangkep Nggeluh)
SENINA SINEREH : Ah kap nina anak beruta, oratina kerna perpulungta. Terjeng ija kin perpulungta ibas wari sisendah, gelah sipeseh man anak beruta.
3. Sembuyak Sinereh man Sembuyakna :
Uga perpulungta kita lebe X morgana, adi kuakap sekalenda terjeng bagenda nge lebe perpulungta ibas wari sisendah terlebih enggo ije Senina kuranan bagepe Anak beruta enggo ije. Enda me pesehndu man Anak Beruta.
4. SEMBUYAK SiNereh :
Payo bapa/ senina…. Sekalenda, bage-bage denga kin ngenca perpulungta ibas wari si sendah, em gelah peseh seninata man anak beruta.
5. Senina Sinereh Man Anak Beruna :
Man Kam Anak beru kami, Anak Beru X mergana, Sekalenda impal !, terjeng bagenda denga ngenca perpulungta terlebih kam pe anak beru, piga-piga mewakili denga ngenca sekalenda. Emaka enggo banci teruskenndu.
6. ANAK BERU SINEREH :
Adi bage, ertima kam lebe kalimbu kami, gelah orati kami lebe si reh enda.
........................................................................................................................................
Nungkun Perpulung Arah Si EMPO/SIDILAKI :
7. Anak Beru SiEMPO man Kalimbubuna :
Man kam kerina kalimbubu kami Y … mergana, ibas kerehenta ku jabu kalimbubuta X mergana, uga perpulungndu ras sembuyak seninandu sue ras tenah sitenahkenndu, terlebih kami Anak berundu. Lit denga kin si man timan ! Gelah enggo banci sibenaken percakapenta.
8. Senina SiEMPO man Sembuyak : Ija kam ndai Senina, sembuyak kami kam Y mergana. Enda enggo nungkun Anak beruta, kerna kerehenta ibas wari sisendah ku jabu kalimbubuta X mergana. Lit denga nge siman timan ?
9. Sembuyak Siempo : Adi ibas wari sisendah, kita denga kin ngenca raduken ras anak beruta, emaka enggo banci terusken percakapenta.
10. Senina Siempo : Ue senina, gelah kupeseh man anak beruta.
11. Senina SiEmpo : man kam anak beru sikelengi kami, ibas wari sisendah, terjeng bagenda denga ngenca perpulungta ibas kerehenta ku jabu kalimbubuta I Rumah enda.
12. Anak Beru Siempo : Ue mama/impal.. adi bage, me enggo banci terusken kami percakapenta ?
13. Senina Siempo : Enggo impal…teruskenndu.
C. BENAI RUNGGU :
1. Anak Beru Siempo Man Anak Beru Sinereh : Ndudurken isap.
Enda isap kami impal, ……. (Adi lenga sitandan, banci pe ia sitandan/ ertutur lebe)
2. Anak Beru Sinereh : Ue impal, ijenda me kita radu ngisap…. Janah ipesehna man temanna sedalanen….enda isap impalta enda nake. …..
3. Anak beru SInereh : Enggo seh isapndu impal, enggo entabeh akap kami ngisap, kai kin ndai sura-surandu.
4. Anak Beru Siempo : Enda kami reh ras kalimbubu kami Y mergana, uga kin perpulung kalimbubuta X mergana rikut pe ras kam Anak Beru.
5. Anak Beru Sinereh : Ertima kam lebe impal, maka orati kami kalimbubu kami.
6. Anak Beru Sinereh : Man kam kalimbubu kami X mergana, mami bagepe nina turangku, tertinggel-tinggel dage kam gelah benai kami percakapen.
7. Senina Sinereh man Anak beruna : Ue impal, benakenndu rananta, orati kam kerna kerehen Y mergana …kami enggo sikap megikenca.
8. Anak Beru Sinereh man Anak Beru SIEMPO : Bagenda impal, sope denga sibenaken percakapenta, segelah erdalan kari mehuli sue ras peraten Dibata, ibabaindu lebe alu pertoton. …………………………ertoto…………………………………………
9. Anak Beru Sinereh Man Anak Beru Siempo : Bagenda impal, enggo entabeh akap kami man ras kalimbubu kami arah nakan sibabandu, emaka kai kin kata nakan ibas kerehenndu sekalenda ras kalimbubundu Y mergana, gelah peseh kami man kalimbubu kami X mergana.
10.Anak beru Siempo :
Ertima Kam lebe impal, maka orati kami kalimbubu kami.
11. Anak Beru Siempo Man Kalimbubuna/Tegun Senina :
Eak impal, bagenda nina kalimbubuta X mergana erkelang-kelangken anak beruna. Enggo entabeh man arah nakan sibaba ku jabu kalimbubuta X mergana, enda iorati kalimbubuta X mergana kita kerna kerehenta ku jabu kalimbubuta erkelang-kelangken kami anak beru, uga ningkami ngaloi ranan anak beru X mergana, arih kam ras senina sembuyakndu.
12. Senina Siempo : ertima kam lebe anak beru kami, maka arih kami kalimbubundu.
13. Senina Siempo Man Sembuyak :
Eaak….senina kami Y mergana, bagi enggo ndai ituriken anak beruta, enda iorati kalimbubuta X mergana erkelangken anak beruta, kerna sura-surata reh ku jabu kalimbubuta X mergana . Arih dage kita, gelah e lah kari peseh anak beruta man anak beru X mergana.
D. PETANDAKEN :
14. Sembuyak SiEmpo:
Bagenda senina…. Sope lenga situriken sura-surata, pesehndulah man anak beruta, segelah arih ia ras Anak beru X mergana, gelah sipetandaken lebe kita si reh enda man kalimbubuta X mergana, kenca si e kari maka situriken sura-surata.
15. Senina SiEMPO : Pesehndu lebe man kalimbubuta X mergana erkelang-kelangken anak beruna, mehuli iakap kami adi sipetandaken lebe kita si reh enda, segelah bagi semalna Kalak Karo, adi enggo kari kita sitandan, banci pe kari terdauhen sibahan orat tuturta pekepar.
16. Anak Beru Siempo :
Ue impal, banci peseh kami
17. Anak Beru Siempo Man Anak Beru Sinereh :
Bagenda impal, Ibas kerehen kami ku jabu kalimbubuta, Lit nge sura-sura kami simehuli nangndangi kalimbubuta X mergana, tapi sope lenga ituriken kami, me merandal kin iakapndu adi ipetandaken kami lebe diri kami si reh enda man kalimbubuta, bagepe man bandu anak beru X mergana.
18. Anak Beru SiNereh : Oe…..ertima kam lebe impal, maka peseh kami rananndu enda man kalimbubu kami.
19. Anak Beru Sinereh man Kalimbubuna :
Enggo entabeh siakap man arah nakan sibaba temueta, janah enggo iorati kami kerna kata nakan, terlebih sura-surana ku jabundu ibas wari si sendah. Reh nina Y mergana erkelangken kami anak beru, lit ngenda sura-surana simehuli ku jabundu ibas wari si sendah. Tapi sope lenga iturikenna Sura-surana, nungkun ia , nina : me mehuli kin adi ipetandaken kami lebe diri kami nina !. Uga ningkami ngaloi ranan Anak beru Y mergana. Arih kam kalimbubu kami.
20. Senina Sinereh : Ertima kam lebe anak beru kami, maka kami arih.
21. Senina SiNereh Man Sembuyak : Bagenda senina…bapa ….. Enggo radu ras kita megi kai si ituriken anak beruta, sope lenga ipeseh Y mergana kerna sura-surana, ipetandakenna lebe dirina man banta, uga siakap…
22. Sembuyak Sinereh : ( Arih ras sembuyakna )….Uga ninta nake….Enggo merandal, senina.
23. Senina SiNereh Man Anak Beruna :
Enggo Payo bagi siturikenndu impal, adi bage, suruh dage si reh enda ndai empetandaken dirina, kenca kari ia dung empetandaken dirina, kita pe sipetandaken ka dirita maka radu ras kita kari kerina meteh kerna ganjang teruk orat tuturta.
24. Anak Beru sinereh : Ue impal,…gelah peseh kami katandu enda man anak beru Y mergana.
25. Anak Beru Sinereh Man Anak Beru SiEmpo :
Bagenda impal, kerna ipetandakenndu lebe dirindu si reh ku jabu kalimbubu kami ibas wari si sendah, enggo iakap kami mehuli ras kalimbubu kami, Adi bage, enggo banci benaindu.
26. Anak Beru SiEmpo Man Anak Beru Sinereh : Bujur impal, pernehenndu dage kami, segelah ipetandaken kami diri kami.
27. Anak Beru SiEmpo Man Kalimbubuna :
Enggo banci kita petandaken lebe man kalimbubuta, emaka tedis kita kerina, janah kam nge erbelas empetandaken kita kerina si reh enda.
Senina Siempo : Merandal impal,…. ( emaka isuruhna Sembuyak empetandaken kerina )
28. Sembuyak Siempo : ( Persentabin/Pengataken bujur man Dibata )
Enda Sembuyak kami si tergelar……..ras Nande kemberahen beru….. Janah enda anak ipupus i tengah jabu sembuyak kami enda,(Tuduhken Si Atena Erjabu ) si tergelar……………. Si lit sura-sura ndahi kalimbubu raduken ras kami sembuyak,senina bagepe anak beru.
( ipetandakenna seh ku senina ras Anak beru / kerina si reh arah si Empo )
29. Senina Siempo man Anak Beruna : eaaak…impal/ bengkila… enggo me kuakap kuh sipetandaken dirita, teruskenndu dage rananta.
30. Anak Beru : Ue impal, banci terusken kami.
31. Anak Beru Siempo man Anak Beru Sinereh :
Eak, impal….enggo ipetandaken kami diri kami kerina, enggo kin ndia banci ituriken kami sura-sura kami ?
32. Anak Beru Sinereh : Ertima kam lebe impal, kuorati lebe kalimbubu kami.
33. Anak Beru Sinereh Man Kalimbubuna : Ija kam ndai impal/mama…. Enggo ipetandaken Y mergana dirina ras kerina si reh ku jabu enda, emaka nungkun ia, enggo ndia banci turiken kami kerna sura-sura kami nina, uga ningkami ngaloi ranan anak beru Y mergana.
34. Senina Sinereh : Ertima kam lebe anak beru kami, gelah kupeseh ranan enda man sembuyak kami, kalimbubundu.
35. Anak Beru Sinereh : Ue, impal, arih dage kam.
36. Senina Sinereh man Sembuyak : Bagenda kam kerina senina/sembuyak kami, enggo ndai ipetandaken Y mergana dirina, raduken ras kerina ia si reh, emaka nungkun ia tole, enggo nge banci sehkenna Sura-surana nina erkelangken anak beruta. Uga ninta ngaloi ranan anak beruta.
37. Sembuyak Sinereh: Bagenda senina, rikutken semalna, adi si reh epe ipetandakenna dirina, tentu kita pe sipetandaken ka dirita raduken ras kerina kita sipulung ijenda.
38. Senina Sinereh : Adi bage, kita pe tedis segelah tampak kita kerina. Kam erbelas sembuyak kami guna petandaken dirita kerina. ( TEDIS KERINA )
39. Sembuyak Sinereh : ( Kata Pengalo-ngalo/Pengataken bujur man Dibata )
Aku…….. enda……….ras kemberahen …. Janah enda Sembuyak kami Simada Jabu ras Kemberahen bagepe enda ANAK KAMI Beru……bere……ipupus sembuyak kami tengah jabu enda,………. (Teruspe ipetandaken kerina sipulung she ku Anak Beru )
40. Sembuyak SiNereh man Seninana :
Enda me kita kerina sipulung ibas wari sisendah, enggo banci kita kundul, janah teruskenndu rananta man anak beruta, terlebih kerna sura-sura Y mergana ibas wari sisendah.
41. Senina Sinereh man Anak Beruna:
Bagenda impal/Bengkila…. Adi enggo kita sitandan pekepar, enggo banci torosindu kerna sura-sura Y mergana sendah reh ku jabuta, teruskenndu dage rananta enda.
E. NUNGKUN KATA :
1. Anak Beru SiNereh man Anak Beru Siempo :
Bagenda impal,…Enggo ndai kita petandaken pekepar, kerna ganjang terukna banci ka nge kari siembari terdauhen kenca dung kari kita runggu enda, Emaka reh nina kalimbubu kami, Kai dage sura-surandu ras Kalimbubundu reh ku Jabu kalimbubu kami X mergana ibas wari sisendah !
2. Anak Beru SiEmpo :
Ertima kam impal, gelah orati kami kalimbubu kami.
3. Anak Beru SiNereh : Ue impal, ertima kami.
4. Anak Beru Siempo man Senina Siempo :
Bagenda impal/mama….adi enggo kita petandaken pekepar, emaka nungkun kalimbubuta X mergana erkelangken kami anak beru, Kai dage SURA-SURATA reh ku jabu kalimbubuta X Mergana ibas wari sisendah. Arih dage kam, gelah ituriken kami.
5. Senina SiEmpo Man Sembuyakna :
Ah kap nina anak beruta senina,….Kerna sura-surata reh ku jabu kalimbubuta X mergana, uga ninta ngaloi ranan e…
6. Sembuyak siEmpo : ( Arih-arih ras sembuyak sideban. Uga ninta…… )
I. NUNGKUN DIRI KALIMBUBU / ERTEPETEN :
7. Sembuyak SiEmpo man Seninana :
Bagenda senina, Turikenndu sura-surata bagi sienggo turiken anakta man bandu.
8. Senina Siempo Man Anak Beruna :
Man kam anak beru kami, turikenndulah kerna sura-sura permenndu/impalndu emekap anak kekelengen kami si tergelar ................bere-bere...........kempu......... maka enggo jumpa atena ngena dingen tutus atena nangndangi diri kalimbubuta X mergana sitergelar ........beru....bere-bere..... kempu....., emaka enggo lit arih-arihna kerna arih-arih simedanak, arih-arih singuda-nguda anak perana segelah sicakapken alu mehuli. Me Labo kin Salah tepetenta kerna diri Kalimbubuta ku Jabu enda ? Enda me sura-suranta sekalenda reh ku jabu kalimbubuta, terbeluh kam nuriken kata.
9. Anak Beru Siempo : Ue impal, banci kupeseh sura-sura enda man anak beru X mergana.
10. Anak Beru Siempo Man Anak Beru SiNereh :
Bagenda impal, Enda reh kami ras Kalimbubu kami , erkiteken enggo lit arih-arih simedanak ibas diri kalimbubu kami si tergelar ...................bere-bere.........kempu..............kutana............ingan tading.............. nangndangi diri kalimbubuta..................mergana si TERGELAR..........beru.........bere-bere.................kempu................. maka enggo ia singenan dingen tutus pe atena kerna njabuken bana. Emaka nungkun kami man bandu anak beru X mergana: ME LIT KIN ibas diri kalimbubuta X mergana TERGELAR bagi sikataken kami enda ?
11. Anak Beru SiNereh : Ertima kam lebe impal, gelah kuorati kalimbubu kami.
12. Anak Beru Sinereh man Senina Sinereh :
Eak mama, impal , mami ,nina turangku bagepe kam kerina kalimbubu kami. Ibas kerehen Y mergana ku jabundu sekalenda, enggo iturikenna kerna sura-surana, e me kap : enggo lit arih-ari simedanak , arih-arih singuda-nguda anak perana telebih-lebih enggo tutus kal atena ibas njabuken bana. Emaka nungkun X mergana erkelang-kelangken kami Anak Beru, ME LIT KIN DIRINDU si tergelar .....................bere-bere...........kempu......... ibas jabundu kalimbubu kami X mergana. Arih dage kam kalimbubu kami, maka orati kami kari terdauhen adi lit kin ibas dirindu gelar bagi sibelaskenna e.
13. Senina SiNereh Man Anak Beruna :
Ertima kam lebe anak beru kami, gelah kuorati senina sembuyak kami.
14. Senina SiNereh Man Sembuyakna :
Ah kap nina anak beruta, enggo lit arih-ari simedanak Y mergana nangndangi dirita . ME LIT KIN IBAS DIRITA , si tergelar.....bere-bere.......kempu.............bagi si ituriken anak beruta ndai ? Sioraten dage kita ! gelah sibelasken man anak beruta.
15. Sembuyak Sinereh Sapih ia :
Ah kap nina anak beruta, maka enggo lit arih-ari simedanak nangndangi dirita . Me lit kin ibas dirita si tergelar.....bere-bere.......kempu.............bagi si ituriken anak beruta ndai ? maka sibelasken man anak beruta. Sioraten dage kita !
16. Sembuyak Sinereh/Senina man Anak Beruna :
Kerina kam anak beru kami,.. kam kap si ermakan kami. Tentu, kam pe tandaindu nge kerina permakanenndu i tengah-tengah jabu kami.
17. Anak Beru SiNereh :
Payo bagi katandu kalimbubu kami, kami nge sipermakani dirindu. Tapi ibas tepeten e, la banci jului kami belas-belasndu kerna dirindu i tengah jabundu, emaka kam lah erbelas.
18. Sembuyak Sinereh :
Ah me nina anak beruta, em tandana mehamat ia erkalimbubu. Adi bage, kita lah erbelas kerna dirinta. Sitergelar bagi sikataken anak beruta, Lit itengah-tengan jabu sembuyakta ibas jabu enda, ……………. Em belaskenndu senina kami.
19. Senina Sinereh man Anak Beruna :
Bagenda impal, penungkunenndu kerna DIRI kami ibas kalimbubundu bagi sitergelar sikatakenndu ndai LIT IBAS KAMI. Em katakenndu man Anak Beru Y mergana.
20. Anak Beru Sinereh Man Anak Beru SiEmpo :
Bagenda impal, penungkunenndu kerna DIRI kalimbubu kami, Lit ibas diri Kalimbubu kami, La kam Salah Tepeten sue ras sikatakenndu. Adi bage, kai denga kin sura-surandu ?
21. Anak Beru SiEmpo Man Anak Beru Sinereh :
Bujur Impal, Ertima kam lebe gelah kupeseh man kalimbubu kami.
22. Anak Beru Siempo Man Senina siempo :
Eak mama,impal. Kerna penungkunenta DIRI kalimbubuta sitergelar bagi sibelaskenndu ndai Lit ibas diri kalimbubuta X mergana. Kai nari dage sura-surata nangdangi kalimbubuta , arih kam gelah ituriken kami anak berundu.
23. Senina Siempo Man Sembuyak :
Bagenda senina, Kerna diri ibas jabu Kalimbubuta X mergana bagi sibelasken ndai, labo kita SALAH TEPETEN , Lit Ibas diri Kalimbubuta X mergana. Adi bage, kai nari dage Sura-surata nangndangi kalimbubuta X mergana, nina Anak Beruta… arih dage kita kerina, gelah ipeseh anak beruta.
II. NUNGKUN KATA KERIAHEN KALIMBUBU
A. NUNGKUN KATA :
1. Sembuyak Siempo man Seninana :
Adi bage, turikenndulah tole sura-suranta kerna Nungkun Kata ras Keriahen ukur Kalimbubu bagepe temanta sendalanen anak beru X mergana. Terbeluh kam encibalken kata.
2. Senina Siempo Man Anak Beruna :
Bagenda impal, Kerehenta sekalenda ku jabu Kalimbubuta X merganna, erkiteken ketutusen nangndangi diri kalimbubuta X mergana, emaka ibas wari sisendah ate kami Nungkun Kata Keriahen ukur kalimbubuta X mergana bagepe ras kerina anak beru X mergana, Adi banci min erjabu/erdemu min ate diri kami ras diri kalimbubuta X mergana.
3. Anak Beru Siempo man Anak Beru Sinereh :
Bagenda impal, Kerna ketutusen ate nangndangi diri kalimbubuta X mergana, emaka ibas wari sisendah ipeseh kami me Sura-sura kami nagndangi kalimbubuta X mergana bagepe kam anak beru X mergana. Ibas kerehen kami sekalenda, ate kami Nungkun Kata Keriahen Ukur kalimbubuta X mergana bagepe ras kam kerina anak beru X mergana, Adi banci min erjabu/erdemu ate diri kalimbubu kami Y mergana ras diri kalimbubuta X mergana. Enda me sura-sura kami impal, terbeluh kam encibalken ranan, janah sampatindu kami pelapang sura-sura kami enda.
4. Anak Beru Sinereh :
oo…ooee…. Ertima kam impal, gelah kupeseh sura-surandu e man kalimbubu kami.
5. Anak Beru Sinereh Man Kalimbubuna :
Eak mama, impal. Ah kap nina Y mergana erkelang-kelangken kami Anak berundu, sue ras ketutusen atena nangndangi dirindu emaka ibas wari sisendah atena Nungkun Kata Keriahen Ukurndu kerina kalimbubu kami, adi banci erdemu min atena ras dirindu kalimbubu kami. Uga ningkami ngaloi kata anak beru Y mergana.
6. Senina Sinereh Man Sembuyakna :
Ah kap nina anak beruta, kepeken sura-sura Y mergana , erdemu min atena ras dirinta. Uga ninta ngaloi ranan anak beruta.
7. Sembuyak Sinereh sapih ia :
Ah kap nina Y mergana erkelang-kelangken anak beruta. Enggo iturikenna kerna ketutusen atena nangndangi dirita X mergana, adi banci erdemu min atena ras dirita. Uga ninta ngaloi ranan anak beruta.
B. PETANGKAS SI EMPO Ras SITERSEREH
1. Sembuyak/ Senina Sinereh man Anak Beruna :
Bagenda impal, kam anak beru kami . Enggo kin tangkas penandaindu ise si reh sierdemu atena e,
cuba dage siksikindu janah orati pe permenndu.
2. Anak Beru Sinereh man Anak Beru Siempo :
Eak impal, ope denga ijawab kami penungkunenndu ndai, apai dage kalimbubundu si erdemu atena ras diri kalimbubu kami e, maka petangkasndu gelah tangkas ka man kami.
3. Anak Beru Siempo man CALON SIEMPO :
Tedis kam permen (calon Penganten Sidilaki), Aku jelmana nindu,
4. CALON SIEMPO :
Aku jelmana bengkila, Gelarku……..Bere…….kempu……. Enggo tutus kal ateku njabuken bana ras beru X , emaka teruskenndu runggu enda bengkila.
5. Anak Beru Siempo man Anak beru Sinereh :
Enda permen kami si atena erdemu ras diri kalimbubuta. Me enggo tangkas man bandu impal ?
6. Anak Beru Si Nereh Man Anak Beru SiEmpo :
Enggo impal. Enggo tangkas man kami anak beru X mergana. Ertima kam gelah orati kami lebe permen kami beru X.
7. Anak Beru Sinereh Man Calon SISEREH :
Petedisna Sitersereh, bagenda permen begkilana….. Payo kin ah jelmana sienggo lit arih-arih kena e
permen ? Me labo salah si reh e ?
8. CALON SITERSEREH :
Payo bengkila, ia me jelmana. enggo tutus ateku, teruskenndu bengkila, pelapangndu ia.
9. Anak Beru Sinereh :
Eak mama, impal. Enggo ndai siksiki kami janah enggo orati kami pe permen kami. Maka payo nge e
temanna arih-arih e janah enggo tutus ate kami bengkila, nina…. Adi bage, uga dage ningkami ngaloi ranan Anak beru Y Mergana ndai.
10. Sukut SiNereh man Sembuyak :
Ah kap nina anak beruta senina…Uga dage ninta kerina sukut ibas ngaloi ranan anak beruta.
C. NGORATI ANAK BERU / BIBI SIREMBAH KULAU
1. Sembuyak Sinereh Man Anak Beruna:
Bagenda anak beru kami, enggo gia lit arih-arih permenndu ras Y mergana, tapi kam nge kerina anak beru kami bagepe turang kami sindoah didongken permenndu anak kami beru............... enda
Emaka kam lah simetehsa kerna permenndu. Arihlah kam kerina anak beru kami.
2. Anak Beru Sapih-sapih ia :
kap nina kalimbubuta, kita kap simetehsa kerna permenta beru X. Uga dage ninta. Sioraten dage kita entahkin enggo lit anakta anak perana, entahpe enggo leben lit siarih-arihi permenta beru X. Uga ninta nake !
3. Anak Beru Sinereh : Bas kami lenga bo lit, tapi sioratilah beru X ../bibi/impalta kerina sebab ia nge sierdoah didong, si Roahisa kitik-kitik nari permenta. Eak, senina (Anak Beru Sinereh 2), Tedis kam, maka kam ngoratisa impalta kerina
4. Anak Beru Sinereh 2 : Man bandu kerina Bibi/impal/permen kami. Ibas wari sisendah enggo reh Y mergana ku jabu kalimbubuta, atena nungkun kata keriahenta maka atena erdemu ras permenta sitergelar..............beru.....X... Emaka uga ibas kam kerina impal/bibi kami. Meriah nge ukurta ? entahkin enggo leben lit arih-arihndu ras permenta beru X. Arih dage kam /si oraten dage kam kerina.
(Cataten : Adi kune ije sitahanen/La meriah ukur bibina,maka pekepar Calon sidilaki ras orangtuana mereken kampil/isap man Anak beru/bibi sidiberu maka pesalangna kerehenna ku jabu kalimbubu).
5. Bibi SiSereh Sapih ia: Sioraten.. Uga nake, apai kin lit anakta anak perana, entah kita si enggo lit arihta ras permenta. Adi lenga lit, ula ka si pe lit-lit,..
6. Bibi SiSereh Man Calon SiSereh :
Ija kam ndai permen, enggo kin tutus kel atendu e nakku... lit nge impalndu i rumah.. meganjang kang
Sekolahna,….enggo erdahin, sikap pendahinna, she kal mbestangna impalndu ah, ya……
7. Calon SiSereh Man Bibina :
Kueteh nge impalku enterem bibi…bengkila.... tapi La kami jodoh ibahan Dibata, si reh e pe mehuli kal ia... Beluh nge aku pagi mbabaisa ku tengah jabundu makai a pe jadi anakndu.
8. Nina Bibi SiNereh ku Sapih-sapih ia :
Eak..nake.. ija kita kerina bibina... enam… me enggo sibegi kai nina permenta, si reh enda ndai pe, mehuli nge ia nina. Me meriah nge ukurta ngalokensa ?. ibabaina nge pagi ia ndahi kita, gelah jadi anakta, adi bage, aku pe lanai kukeri ukurku, ug adage ninta kerina.
9. Bibi SiNereh Man Anak Beru SiNereh :
Adi oratindu kerna kerna keriahen ukur kami, labo kami beluh njawabsa meriah tah lang !. Erkiteken anakta pe enggo lit galang, enggo ka erdahin, terlebih kami nge si roahisa kitik2 nari permen kami enda, emaka morah kal ate kami kalimbubu,..... Tapi uga ibahan, la sangap sekalenda kami beru Y. Tek kami, jodoh, pudun erjabu emekap ibas Tuhan nari, lanai bo peratenta sijadi. Enterem denga kap permenta, e pagi endik-endik kami man singumban kami. Terlebih-lebih pe si reh ena ndai nambah-nambahi temanta nampati dahin ibas kalimbubuta, enda me sinambah-nambahi keriahen ukur kami. Emaka sipesalanglah dalan man Y mergana ku jabu kalimbubuta. Ulanai simorahi !
10. Anak Beru SINEREH Man Senina SiNereh :
Eak mama /impal. Enggo kami arih kerina anak berundu terlebih nande /bibi ras impal kami kerina beru X.., maka enggo ersada arih kami guna pesalang dalan ibas sura-sura Y mergana erdemu ras permen kami beru X. Ertambah-tambah keriahen kami sebab enggo tambah pagi teman kami ibas ndungi dahin-dahinndu kam kerina kalimbubu kami. Adi bage, uga dage ibas kam kerina kalimbubu kami, maka banci aloi kami sura-sura Y mergana erkelang-kelangken anak beruna.
11. Senina SiNereh Man Sembuyak :
Ah kap nina anak beruta, maka ia pe enggo meriah ukurna. Uga dage ninta kerina sukut X mergana.
12. Sembuyak Sinereh Man Seninana :
Adi Anak Beruta pe enggo ersada arihna, janah meriah ukuna guna pesalang sura-sura Y mergana, tentu kita pe enggo meriah ukurta. Enggo banci terusken percakapenta nindu man Anak Beruta.
13. Senina SiNereh Man Anak Beruna :
Adi kam pe Anak beru kami enggo meriah ukurndu, kami pe meriah ukur kami. Teruskenndu percakapenta.
14. Anak Beru SiNereh Man Senina SiNereh :
Ue,..impal. Banci peseh kami rananta enda.
15. Anak Beru SiNereh Man Anak Beru SIEMPO :
Eak impal, sue ras pemindonndu ibas Nungkun Kata Keriahen kalimbubu bagepe ras kami anak beru X mergana, Enggo kami arih ras kalimbubu kami. Enggo meriah ukur kami ibas kerehendu sekalenda. Janah enggo pesalang kami kerna sura-surandu. Adi bage, kuja nari percakapenta.
16. Anak Beru SiEmpo Man Anak Beru Sinereh :
Bujur impal, enggo sampatindu kami. Ertima kam lebe gelah peseh kami man kalimbubu kami.
17. Anak Beru Siempo Man Senina SiEmpo :
Man kam kerina kalimbubu kami Y mergana, Kerna pemindonta ibas wari sisendah, ibas nungkun Kata Keriahen kalimbubu X mergana bagepe ras Anak beruna ibas sura-sura permen kami erdemu ras diri kalimbubuta X mergana, maka enggo meriah ukurna kerina rikut pe ras anak beru. Adi bage, kuja nari siterusken rungguta enda.
D. ERBAHAN PUDUN MABA BELO SELAMBAR
1. Sembuyak Siempo Man Seninana :
Pertama-tama pesehndu lebe pengataken bujur man Kalimbubuta X mergana kerna keriahen ukur ibas kita nungkun kata, terlebih kerina Anak beru X mergana erkiteken enggo ipesalangna dalanta ku jabu kalimbubuta X mergana. Rikutken ketutusen ateta, Ndigan nge warina salang sai ibas kalimbubuta , gelah banci kita reh Mbaba Belo Selambar.
2. Senina Siempo Man Anak Beruna:
Bagenda impal,... Adi enggo meriah ukur kalimbuta ras Anak beruna, rikutken ketutusen ateta nangndangi diri kalimbubuta, orati dage Ndigan kita banci reh Maba Belo Selambar erkelangken anak beru.
3. Anak Beru SiEmpo Man Anak Beru Sinereh :
Bagenda impal,.. Rikutken ketutusen ate kami ku jabu kalimbubuta X mergana, Ndigan nge warina salang sai ibas Kalimbubuta bagepe kam anak beru, segelah reh kami Mbaba Belo Selambar.
4. Anak Beru SiSereh Man SiEmpo :
Ertima kam impal, gelah kuorati kalimbubu kami.
5. Anak Beru SiSereh Man Senina SiNereh :
Bagenda impal, reh nina Y mergana erkelangken anak beruna ! Tandana ate kami tutus nangndangi dirindu kalimbubu kami X mergana, Ndigan nge ndia banci kami reh Maba Belo Selambar nina,… uga ningkami ngaloisa.
6. Senina Sinereh Man Anak Beruna :
Bagenda impal, adi kerna warina, kam lah metehsa anak beru kami, sebab kam kap galah gedang kami. Amin bage gia, oratilah anak beru Y mergana, entah enggo kin lit babana wari siman pandang-pandangen.
7. Anak Beru Sinereh man Anak Beru Siempo:
Bagenda impal, adi kerna, wari entahkin enggo lit babandu wari simehuli si man pandang-pandangen, turikenndu lebe impal.
8. Anak Beru SiEmpo Man Anak Beru Sinereh :
Tertinggel-tinggel dage kita mpal….Ersura-sura kerehen kami, Reh Maba Belo Selambar ku jabu kalimbubuta X mergana emekep : ibas Wari Minggu, tanggal 12 Juni 2022 Jam 15.00 WIB. Enda me wari sibaba kami man pandang-pandangenta impal, uga nindu ras kalimbubuta. Me lenga bo lit pudun sialokenndu ibas wari si enda ndai ? Arih dage kam ras kalimbubuta.
9. Anak Beru SiNereh man Senina/Sembuyak Sinereh :
Eak,..impal.. enggo tangkas iorati Y mergana erkelangken anak beruna. Kerna wari siman pandang-pandangen enggo ndai radu ras kita megikenca, Uga ibas kam kalimbubu kami, me lenga bo lit pudun ialokenndu ? Adi ibas kami anak berundu, lenga bo lit. Arih dage kam.
10. Senina/Sembuyak…Arih-arih….
11. Senina Sinereh Man Anak Beruna : Ibas kami pe lenga bo lit aloken kami pudun impal..!!. Adi bage, Enggo sue ras ersada arihta. Banci teruskenndu .
12. Anak Beru Sinereh man Anak Beru Siempo:
Bagenda impal,…Kerna wari sibabandu, ibas kerehenndu ibas Maba Belo Selambar ku jabu kalimbubu kami X mergana, La lit rongketna. Adi bage, Kai Nari dage atendu.
13. Anak Beru Siempo man Anak Beru Sinereh: Bujur impal, ertima dage kam lebe, gelah peseh kami man kalimbubu kami.
14. Anak Beru Sinereh Man Senina/Sukut :
Bagenda impal, kerna wari si baba kita ibas sura-surata Maba Belo Selambar enggo sue arih ras kalimbubuta, Labo lit rongketna. Adi bage, kai nari dage sura-surata impal. Arih dage kita kerina.
15. Senina/Sembuyak Siempo:
Enggo merandal impal. Bujur ninta man Kalimbubuta bagepe anak beru X mergana. Adi kuakap, percakapenta ibas wari sekalenda, terjeng bagenda nge ngenca. Bage gia, erpenggurun kita man kalimbubuta X mergana, entah kai nari kin sikurangna gelah sieteh ersikap.
16. Anak Beru Siempo man Anak Beru Sinereh : Bagenda impal, adi enggo ersada arihta kerna wari Maba Belo Selambar, akap kami terjeng bagenda nge ngenca percakapenta ibas wari sisendah. Adi bage gia, kai nari kin akapndu sikurangna, arih kam kerina terus ku kalimbubuta.
17. Anak Beru sinereh Nungkun Man Kalimbubuna: Kai nari sikurang…………….
18. Anak Beru Sinereh man Anak Beru Siempo: Nina Kalimbubu kami, lanai bo lit sikurangna impal, Adi lit kari silupata, kita anak beru si suaan. Adi bage, enggo banci situtup perjumpanta, segelah enggo kita banci ngisap-ngisap raduken kalimbubuta.
19. Itutup Alu Pertoton.
20. Ngisap-ngisap
Bujur Ras mejuah-juah…..By Matius Purba
( Mohon Koreksi )
Tidak ada komentar:
Posting Komentar